സ്ത്രീ ഇസ് ലാമിൽ: സമകാലിക ആരോപണങ്ങളും യാഥാർഥ്യങ്ങളും

ആധുനിക സമൂഹത്തിൽ ഇസ് ലാമിനെതിരെ ഏറ്റവും കൂടുതൽ പ്രചരിപ്പിക്കപ്പെടുന്ന ഒരു ആരോപണമാണ് "സ്ത്രീകളെ അടിച്ചമർത്തുന്നു, അവൾക്ക് യാതൊരു സ്വാതന്ത്ര്യവും അവകാശങ്ങളും നൽകാതെ മാറ്റിനിർത്തുന്നു" എന്നത്. എന്നാൽ ചരിത്രപരവും പ്രമാണപരവുമായ യാഥാർഥ്യങ്ങളെ മുൻനിർത്തി പരിശോധിക്കുമ്പോൾ, ആധുനിക ലോകം സ്ത്രീവിമോചനത്തെക്കുറിച്ച് ചിന്തിക്കുന്നതിനും നൂറ്റാണ്ടുകൾക്കു മുമ്പ് സ്ത്രീക്ക് യഥാർഥ സ്വാതന്ത്ര്യവും പ്രതാപവും അഭിമാനവും ഉറപ്പുനൽകിയ മതമാണ് ഇസ് ലാം എന്ന് വ്യക്തമാകും.
പെൺകുഞ്ഞുങ്ങൾ ജനിക്കുന്നത് തന്നെ കൊടും അപമാനമായി കാണുകയും അവരെ ജീവനോടെ മണ്ണിൽ കുഴിച്ചുമൂടുകയും ചെയ്തിരുന്ന ഒരു ഇരുണ്ട കാലഘട്ടത്തിലാണ് ഇസ് ലാം സ്ത്രീയുടെ രക്ഷകനായി കടന്നുവന്നത്. ആ കാലഘട്ടത്തിലെ കൊടും ക്രൂരതയെയും മനഃസ്ഥിതിയെയും വിശുദ്ധ ഖുർആൻ ഇപ്രകാരം തുറന്നുകാട്ടി:
"അവരിലൊരാൾക്ക് പെൺകുഞ്ഞ് ജനിച്ചുവെന്ന സുവാർത്ത അറിയിക്കപ്പെട്ടാൽ കോപം അടക്കിക്കൊണ്ട് അവന്റെ മുഖം കറുത്തിരുണ്ടു പോകുന്നു. തനിക്ക് നൽകപ്പെട്ട ആ സുവാർത്തയിലെ ദോഷം കാരണം അവൻ ആളുകളിൽ നിന്ന് ഒളിച്ചുനടക്കുന്നു. അപമാനത്തോടെ അതിനെ വെച്ചുകൊണ്ടിരിക്കണമോ അതല്ല അതിനെ മണ്ണിൽ കുഴിച്ചുമൂടണമോ (എന്നതായിരിക്കും അവന്റെ ചിന്ത). അറിയുക! അവർ വിധിക്കുന്നത് എത്രയോ ചീത്ത കാര്യമാണ്!" [ ഖുർആൻ 16: 58-59].
പെൺകുഞ്ഞുങ്ങളെ ജീവനോടെ കുഴിച്ചുമൂടുകയെന്ന അക്രമത്തെ പരലോകത്ത് വിചാരണ ചെയ്യുമെന്ന് അല്ലാഹു പ്രഖ്യാപിച്ചു:
"ജീവനോടെ കുഴിച്ചുമൂടപ്പെട്ട പെൺകുട്ടിയോട് ഏത് കുറ്റത്തിനാണ് താൻ കൊല്ലപ്പെട്ടത് എന്ന് ചോദിക്കപ്പെടുമ്പോൾ..." (ഖുർആൻ 81: 8-9).
പെൺകുഞ്ഞുങ്ങളെ ദൈവത്തിന്റെ അമൂല്യ സമ്മാനവും (ഹിബത്ത്) അനുഗ്രഹവുമായി ഖുർആൻ പ്രഖ്യാപിച്ചു:
"ആകാശങ്ങളുടെയും ഭൂമിയുടെയും ആധിപത്യം അല്ലാഹുവിന്നത്രെ. അവൻ ഉദ്ദേശിക്കുന്നത് അവൻ സൃഷ്ടിക്കുന്നു. അവൻ ഉദ്ദേശിക്കുന്നവർക്ക് അവൻ പെൺമക്കളെ സമ്മാനിക്കുന്നു, അവൻ ഉദ്ദേശിക്കുന്നവർക്ക് ആൺമക്കളെയും സമ്മാനിക്കുന്നു" (42: 49).
പെൺമക്കളെയും സഹോദരിമാരെയും ഇസ് ലാമിക സംസ്കാരം പകർന്നു നൽകി സ്നേഹത്തോടെയും ആദരവോടെയും പോറ്റിവളർത്തുന്നവർക്ക് പരലോകത്ത് പ്രവാചകന്റെ കൂടെ സ്വർഗത്തിൽ ഒരുമിക്കാമെന്ന് നബി(സ്വ) സന്തോഷ വാർത്ത അറിയിച്ചു (സ്വഹീഹ് മുസ് ലിം: 2631, ജാമിഉത്തിർമിദി: 1912). നബി(സ) പറഞ്ഞു: "നിങ്ങൾ പെൺമക്കളെ വെറുക്കരുത്; കാരണം അവർ മനസ്സിന് സന്തോഷം നൽകുന്നവരും അമൂല്യ സമ്പത്തുമാണ്" (മുസ്നദു അഹ്‌മദ്).
ആധുനിക ലോകം തുല്യതയെക്കുറിച്ച് സംസാരിക്കുന്നതിന് എത്രയോ മുമ്പുതന്നെ, "തീർച്ചയായും സ്ത്രീകൾ പുരുഷന്മാരുടെ തുല്യ പങ്കാളികളാണ്" (സുനനു അബീദാവൂദ്: 236, ജാമിഉത്തിർമിദി: 113) എന്ന് പ്രവാചകൻ ﷺ പ്രഖ്യാപിച്ചു. ആരാധനകളിലും സൽകർമങ്ങളിലും അവയുടെ പ്രതിഫലത്തിലും സ്ത്രീക്കും പുരുഷനും തുല്യ പദവിയാണ് അല്ലാഹു നിശ്ചയിച്ചിട്ടുള്ളത്:
"ആണാകട്ടെ പെണ്ണാകട്ടെ, സത്യവിശ്വാസിയായിക്കൊണ്ട് ആര് സൽകർമം ചെയ്യുന്നുവോ അവർക്ക് നാം വിശുദ്ധമായ ജീവിതം നൽകുക തന്നെ ചെയ്യും. അവർ പ്രവർത്തിച്ചുകൊണ്ടിരുന്നതിൽ ഏറ്റവും ഉത്തമമായതിന് അനുസരിച്ച് അവർക്കുള്ള പ്രതിഫലം നാം നൽകുകയും ചെയ്യും." (ഖുർആൻ 16: 97).
ഒരു മാതാവെന്ന നിലയിൽ പിതാവിനെക്കാൾ മൂന്നു മടങ്ങ് ആദരവും മുൻഗണനയുമാണ് മാതാവിനു നൽകപ്പെട്ടിട്ടുള്ളത്. ജനങ്ങളിൽ ഏറ്റവും നല്ല സഹവാസത്തിന് അർഹതയുള്ളത് ആരാണെന്ന ചോദ്യത്തിന് "നിന്റെ ഉമ്മ ' എന്നാണ് നബി(സ) ഉത്തരം നൽകിയത്. ആ ചോദ്യം രണ്ടു തവണ ആവർത്തിച്ചപ്പോഴും അതു തന്നെയായിരുന്നു ഉത്തരം. (സ്വഹീഹുൽ ബുഖാരി: 5971, സ്വഹീഹ് മുസ് ലിം: 2548). യുദ്ധത്തിൽ പങ്കെടുക്കാൻ താൽപര്യം പ്രകടിപ്പിച്ച ഒരാളോട് 'നിനക്ക് ഉമ്മയുണ്ടോ' എന്ന് നബി(സ) ചോദിച്ചു. 'അതെ' എന്ന് അയാൾ പറഞ്ഞപ്പോൾ അവിടുന്ന് പറഞ്ഞു: “എങ്കിൽ അവളോടൊപ്പം താമസിക്കുക, കാരണം സ്വർഗം അവളുടെ കാൽക്കീഴിലാകുന്നു.” "[നസാഈ, ഇബ്നുമാജ). ഈ പ്രഖ്യാപനത്തിലൂടെ സ്ത്രീക്ക് ലഭിച്ച സ്ഥാനത്തെ മറികടക്കാൻ മറ്റൊരു മതത്തിനും ദർശനത്തിനും സാധിച്ചിട്ടില്ല.
ഇന്ന് സ്ത്രീവിമോചനം എന്ന പേരിൽ വിപണി അവളെ സൗന്ദര്യപ്രദർശനത്തിനും കച്ചവട താത്പര്യങ്ങൾക്കുമായി ഉപയോഗിക്കുന്നു. എന്നാൽ സ്ത്രീ ഒരു പ്രദർശന വസ്തുവോ കളിപ്പാവയോ അല്ലെന്നും മറിച്ച് അതീവ ശ്രദ്ധയോടെയും കനിവോടെയും സൂക്ഷിക്കേണ്ട 'പവിത്രമായ പളുങ്ക് പാത്രമാണെ'ന്നുമാണ് പ്രവാചക വചനം (സ്വഹീഹുൽ ബുഖാരി: 6149, സ്വഹീഹ് മുസ് ലിം: 2318). അവളോട് മാന്യമായി പെരുമാറുന്നവനാണ് നിങ്ങളിൽ ഏറ്റവും ഉത്തമൻ എന്ന് നബി(സ) പഠിപ്പിച്ചു.

ഇസ് ലാം സ്ത്രീയുടെ സ്വാതന്ത്ര്യത്തെ ഹനിക്കാനായി അവളുടെ മേൽ അടിച്ചേൽപിച്ചതാണ് ഹിജാബ് എന്നു ചിലർ പ്രചാരണം നടത്തുന്നത് വിവരക്കേടാണ്. ഹിജാബും അത് അവൾക്ക് സംരക്ഷണ കവചമാണ്. വിലപിടിപ്പുള്ള രത്നത്തെ ഭദ്രമായി പെട്ടിയിൽ സൂക്ഷിക്കുന്നത് അതിനെ എല്ലാ വിധത്തിലും സംരക്ഷിക്കാനാണ്. അതേ ധർമമാണ് സ്ത്രീയുടെ വിഷയത്തിൽ ഹിജാബ് നിർവഹിക്കുന്നത്.
"നബിയേ, താങ്കളുടെ പത്നിമാരോടും പുത്രിമാരോടും സത്യവിശ്വാസികളുടെ സ്ത്രീകളോടും അവർ തങ്ങളുടെ മൂടുപടങ്ങൾ തങ്ങളുടെ മേൽ താഴ്ത്തിയിടാൻ പറയുക. അവർ തിരിച്ചറിയപ്പെടാനും അങ്ങനെ ശല്യം ചെയ്യപ്പെടാതിരിക്കാനും അതാണ് ഏറ്റവും അനുയോജ്യമായത്. അല്ലാഹു ഏറെ പൊറുക്കുന്നവനും കരുണാനിധിയുമാകുന്നു." (ഖുർആൻ 33: 59).
സാമ്പത്തിക ബാധ്യതകളും കുടുംബം പോറ്റാനുള്ള കഠിനമായ അധ്വാനഭാരങ്ങളും പൂർണമായും പുരുഷന്റെ ചുമലിൽ ഏൽപ്പിച്ചുകൊണ്ട്, സ്ത്രീക്ക് വീടിനകത്ത് സമാധാനവും വിശ്രമവും സംരക്ഷണവുമാണ് ഇസ് ലാം നൽകിയത്. ഫെമിനിസ്റ്റുകളും ലിബറലിസ്റ്റുകളും പറയുന്ന സ്ത്രീ-പുരുഷ സമത്വം സ്ത്രീവിരുദ്ധമാണ്. അപ്രായോഗികവും സ്ത്രീകൾക്ക് പ്രയാസമുണ്ടാക്കുന്നതുമാണ്.

ആവശ്യഘട്ടങ്ങളിൽ ഇസ് ലാമിക മര്യാദകൾ പാലിച്ച്പുറത്തിറങ്ങാനോ സ്വത്ത് സമ്പാദിക്കാനോ ക്രയവിക്രയം നടത്താനോ അവൾക്ക് സ്വാതന്ത്ര്യമുണ്ട്.
ഇസ് ലാമിൽ സ്ത്രീക്ക് അഭിപ്രായ സ്വാതന്ത്ര്യമില്ലെന്ന വാദത്തെ ചരിത്രം തന്നെ തിരുത്തുന്നുണ്ട്. ഖലീഫ ഉമർ ഇബ്നുൽ ഖത്വാബ് رضي الله عنه വിവാഹമൂല്യത്തിന് (മഹർ) പരിധി നിശ്ചയിക്കാൻ ആലോചിച്ചപ്പോൾ, പള്ളിയിലെ ജനക്കൂട്ടത്തിനിടയിൽനിന്ന് ഒരു സാധാരണ സ്ത്രീ എഴുന്നേറ്റുനിന്ന് സൂറതുന്നിസാഇലെ ഇരുപതാം വചനം ഓതിക്കൊണ്ട് അതിനെ എതിർത്തു:
"...അവരിലൊരാൾക്ക് നിങ്ങൾ ഒരു വലിയ ധനശേഖരം തന്നെ നൽകിയിട്ടുണ്ടെങ്കിലും അതിൽ നിന്ന് യാതൊന്നും നിങ്ങൾ തിരിച്ചുവാങ്ങരുത്..."
ഒരു ഭരണാധികാരി എന്ന നിലയിൽ ഉണ്ടായേക്കാവുന്ന യാതൊരു ഈഗോയുമില്ലാതെ "ആ സ്ത്രീ പറഞ്ഞതാണ് ശരി; ഉമറിന് തെറ്റുപറ്റി" എന്ന് പരസ്യമായി പ്രഖ്യാപിച്ച ഉമർ (റ) വിന്റെ നിലപാട്, ഇസ് ലാമിൽ സ്ത്രീക്കുള്ള അഭിപ്രായ സ്വാതന്ത്ര്യത്തിന്റെയും നീതിയുടെയും ഉദാത്തമായ തെളിവാണ്.
പരലോകത്തും സ്ത്രീക്ക് അത്യുന്നതമായ സൗഭാഗ്യങ്ങളാണ് വാഗ്ദാനം ചെയ്യപ്പെട്ടിട്ടുള്ളത്. "ഒരു സ്ത്രീ തന്റെ അഞ്ചു നേരത്തെ നമസ്കാരം നിർവഹിക്കുകയും, റമദാനിൽ നോമ്പനുഷ്ഠിക്കുകയും, തന്റെ പവിത്രത കാത്തുസൂക്ഷിക്കുകയും, ഭർത്താവിനെ അനുസരിക്കുകയും ചെയ്താൽ അവൾക്ക് സ്വർഗത്തിന്റെ ഏതു കവാടത്തിലൂടെ വേണമെങ്കിലും പ്രവേശിക്കാം" (സ്വഹീഹ് ഇബ്നു ഹിബ്ബാൻ: 4163). സ്വർഗത്തിലെ സ്ത്രീകളുടെ ഒരു തട്ടത്തിന് പോലും ഈ ലോകത്തെ മുഴുവൻ സമ്പത്തിനെക്കാളും മൂല്യമുണ്ടെന്നാണ് നബി ﷺ പഠിപ്പിച്ചത്: "തീർച്ചയായും അവളിൽ ഒരാളുടെ തലയിലുള്ള ഒരു തട്ടം ഈ ദുനിയാവിനെക്കാളും അതിലുള്ള എല്ലാറ്റിനെക്കാളും ഉത്തമമാകുന്നു" (സ്വഹീഹുൽ ബുഖാരി: 2796).
ചുരുക്കത്തിൽ, ഇസ് ലാം സ്ത്രീയെ ഉപഭോഗവസ്തുവായി കാണുന്നതിനെ എതിർക്കുന്നു, അവൾക്ക് അനുയോജ്യമായ പദവിയും സ്വാതന്ത്ര്യവും അവകാശങ്ങളും നൽകുന്നു, അവളുടെ വ്യക്തിത്വത്തിനും പവിത്രതയ്ക്കും ആത്മാഭിമാനത്തിനും പൂർണ സംരക്ഷണം നൽകുന്നു,